Гәрбин диггәт вә јардымына апеллјасија едәнләр бир мүһүм амили унудурлар – чохдан манипулјасија аләтинә чеврилмиш "демократија" анлајышы артыг ширмадыр, гышгыран шүардыр, тәзәјин бәзәјидир. Вә демократија барәдә сөһбәтләр дә мөвзу түкәнәндә сусмамаг үчүн нәдән ҝәлди данышан ики аваранын тапынтысына бәнзәјир. Тәки сусмасынлар. Јохса дарыхаҹаглар.

Либерал дәјәрләр вә инсан һагларындан дәм вуран АБШ вә Авропанын чохүзлүлүјүну азәри мүхалифәти вә обывател кәсим һәлә гәбул етмәсә дә, игтидар анлајыб вә мәһарәтлә истифадә дә едир. 2005-ин октјабрында митинги вәһшиҹәсинә дағыдан игтидарын нүмајәндәси "АБШ-да да бу ҹүр едирләр" дејән вахтдан да әввәл бу мејли ҝөрмәк мүмкүндү. Бу, азәри игтидарына өз репрессија вә амансызлығына һагг газандырмаг үчүн ҝениш саһә верир. Парадокс да бундадыр – диктатор өзүнә һагг газандырмаг үчүн "демократик" дүнјанын тәҹрүбәсини садалајыр. Ҝөстәрир ки, бизә ағыл өјрәдән јанкиләр, англосакслар, франсызлар, алманлар боғаза гәдәр зибилин ичиндәдир. Она ҝөрә дә ағыл өјрәтмәкдән ваз кечиб ҝедиб өзләри демократијанын гејдинә галсынлар. Нә дејәсән, мәнтиги аргументдир.

Сијаси мәһбусларын азадлығындан дәм вуран АБШ-да ҝөрмә габилијјәтини тамамилә итирмиш һинду лидери Леонард Пелтијер 20 илдир сијаси мәһбусдур. Нә олсун ки, АБШ-да ону "сијаси мәһбус" јох, "гатил" адландырырлар. Елә биздә дә мәрһум ҝенерал Ваһид Мусајев, јахуд инди Расим Әкбәров сијаси мәһбус јох, "дөвләт чеврилишчиси" иди.

Ишҝәнҹәләрә сон гојмаға чағыран АБШ-ын ҝизли "һава түрмәләри" вә "Әбу-Грејб биабырчылығы" вар. Бу "демократијанын дајағы" олан дөвләт Гуантанамода артыг 7-ҹи илдир ки әҹнәби вәтәндашлары мәһкәмәсиз-истинтагсыз сахлајыр. Биздә Фәрһад Әлијеви бу ҹүр "ҹәмиси" 19 ај сахладылар. Ким даһа "демократик"дир, дејин?

Игтидара ағыл гојан Испанијанын түрмәләри баск ингилабчылары илә долудур. Онларын аҹлыгдан Буһенвалд сакинләрини хатырладан фотолары гәзетләри "бәзәјир". ЕТА үзвләри 20-25 илдир һәбсдәдирләр. Биздә һеч бу гәдәр чох "јатан" јохдур. Нә олсун ки, Испанијада онлара "сијаси мәһбус" јох, бандит дејирләр? Елә биздәкиләрә дә бандит дејилир.

Инҝилтәрәдә сырф милли азадлыг мүҹадиләси апаран ИРА-нын дешифрә олунмуш үзвләринин һамысы илләрдир "террорчу" вә "бандит" кими түрмәләрдәдир. Алманијада РАФ-ын биринҹи нәсил үзвләри 25-30, икинҹи нәслин нүмајәндәләри исә 20-25 илдир мәһбус һәјаты јашајыр. Бу ил азадлыға чыхмыш Бриҝит Һоҝефелд 20 илдән чохду мәһбусду. Әлбәт, онлар да "сијаси мәһбус" јох, "террорчу"дур. Ахы Авропа Бирлији өлкәләриндә рәсмән 1 нәфәр дә олсун виҹдан мәһбусу јохдур. "Ичәри"дәки минләрлә мүбариз исә "деструктив елементләр","гатилләр"дир. Лап елә биздәки кими.

Сөзүн һәрфи мәнасында каннибаллары һакимијјәтә ҝәтирмиш вә бәсләмиш Франса дејилдими Шәрги Тиморда, Јени Каледонијада лап бу јахынларадәк ҝеносид апаран? Амма јох, Парис әһли Әлијевләрә демократик ислаһатларын ваҹиблијиндән данышыр.

Бир сөзлә, һеч вахт олмадығы гәдәр мәһз инди азәрисајағы игтидарлар өзләрини ҹәзасыз вә тәһлүкәсиз һисс едирләр. АБШ сәфири сәнә сијаси мәһбуслардан данышыр? - Әли Һәсәнов она Гуантанамо илә ҹаваб верәҹәк. Франса сәфири нүмајиш азадлығындан сөз ачыр? – Бакы она Парисдәки тәләбә етиразларынын јатырылмасыны мисал чәкәҹәк. Инҝилтәрә рәсмиси репрессијалара сон гојмаға чағырыр? – Сән дә она Ирагдакы америкос-англосакс ҝеносидиндән, 1 милјондан чох гәтлә јетирилмиш ираглыдан бәһс ет, һәлә десерт кими ИРА-ны да хатырлат.

Бу шкаладан баханда, Гәрб демократија вә инсан һаглары саһәсиндә һеч дә азәри режиминдән габаға ҝетмәјиб. Нә олсун ки АБШ бу истисмары јанкиләрин өзләринә јох, дүнјанын мүхтәлиф јерләриндәки узаг халглара гаршы едир? – мәҝәр инсан һәр јердә инсан дејилми?

Глобал мигјасда демократик дәјәрләрин девалвасијасы ҝедир. Һәм дә сүрәтлә вә дөнмәз. Фукујаманын "тарихин сону" консепсијасы өз башына учур. Либерал дәјәрләр елә бу либералларын өзләринин әлиндә прагматик мәгсәдләрә чатмаг үчүн еффектив силаһдан башга бир шеј дејил. Шпенглерин сөјләдији "Авропанын гүрубу" даһа ејбәҹәр формада "демократијанын гүрубу" илә әвәзләниб. Демократија антидемокраларын "сеһирли чубуғу" олуб. Вә елә бир ан ҝәлиб чатыб ки, бу икиүзлүлүјү "мүтәрәгги Гәрб"ин үзүнә чырпмагла истәнилән диктатор өзүнә индулҝенсија газаныр. Гәрб демократијасына сәмимијјәтлә инананлар исә садәлөвһлүјүн синониминә чеврилиб.

Дүнја дәјәр вә идејаларсыз гала билмир. Демәли, Гәрбсајағы демократијанын өлүмүнү ҝөзләјин вә дәфнинә ҝеҹикмәјин. Онун јеринә исә мүтләг бәшәри дәјәрләр вә инсани идеаллар ҝәләҹәк. Сојуг ағыллы идеја адамлары илә бирликдә.

Һәләлик исә Гәрб демократијасынын икиүзлүлүјү Илһам Әлијев, Миша Саакашвили, Назарбајев, Бәшәр Әсәд... кими персонажларын хејринә ишләјир. Чүнки онларын демократијасы илә бунларын диктатурасы тәкҹә заһири бәр-бәзәји илә фәргләнир...